Madaxweynihii Maraykanka, Donald Trump, ayaa si toos ah u weeraray muhaajiriinta Soomaalida ee ku nool Mareykanka, isagoo sheegay inaysan “waxba ku soo kordhin” dalka isla markaana uu doonaynin inay halkaan joogaan. Hadalladiisu waxay ka soo yeereen kulan golaha wasiirrada, halkaas oo uu ku celiyey in dalku “wadadii khaldan gali doono” haddii la sii wado qaabilaadda dadka uu ugu yeedhay “qashinka”.
Arrintan ayaa ku soo beegmaysa qorshe federaal ah oo lagu sheegay in lagu qaban doono dad ku jira amarro masaafurin ah gobolka Minneapolis meel ay ku badan yihiin Soomaalida. Warbixinno ay markii hore baahisay New York Times ayaa sheegaya in hawlgalkan la filayo inuu bilaabmo todobaadkan, iyadoo la adeegsan doono ku dhowaad 100 wakiil oo ICE ah (Waaxda Xoojinta Socdaalka iyo Xudduubaha).
Madaxda magaalada iyo gobolka ayaa si adag uga hor yimid qorshaha. Duqa Minneapolis Jacob Frey ayaa ka digay in howlgalku “jebi doono habraacyada sharciga” islamarkaana khatar gelin karo muwaadiniin Mareykan ah oo laga yaabo in si khalad ah loo aqoonsado. Labada magaalo ee Twin Cities Minneapolis iyo St Paul waxay hoy u yihiin mid ka mid ah beelaha Soomaalida ee ugu waaweyn caalamka, waxaana halkan ku nool qiyaastii 80,000 qof oo asal ahaan Soomaali ah, iyaga oo intooda badan ah muwaadiniin Mareykan ah.
Xog ka timid Waaxda Amniga Gudaha, oo maamusha ICE, ayaa sheegtay in hay’addu aysan wax dad gaar ah u beegsanayn oo “bartilmaameedku uusan ku xirnayn jinsiyadda ama qowmiyadda, balse xaalada sharciga ee qofka.” Laakiin maamulka Trump ayaa socdaalkii adkeeyey tan iyo markii toddobaadyo ka hor lagu toogtay labo ka mid ah Ilaalada Qaranka ee Washington, DC dhacdadaas oo keentay dhimashada haweeney 20 jir ah oo la yiraahdo Sarah Beckstrom, halka mid kale uu ku dhaawacmay, ka dibna la sheegay in neefta weerarka ay keentay nin asal ahaan ka soo jeeda Afghanistan.
Senatorada iyo mas’uuliyiinta deegaanka ayaa cambaareeyey talaabada, iyagoo ku tilmaamay mid cunsurinimo ah ama ku dhawaad in bulsho gaar ah si indho la’aan ah loo beegsanayo. Senator Saynab Maxamed oo kasoo jeeda Minnesota ayaa ku qortay X in marka wakiillada ICE ay la falgalaan dadka Soomaalida ahi ay ogaan doonaan waxa ay soo sheegeen sannado: in inta badan ay yihiin muwaadiniin Mareykan ah. Guddoomiyaha gobolka, Tim Walz, waxaa uu sheegay in hubinta dambiyada iyo baaritaannada sharci ee loo baahanyahay la taageeri karo, balse “buunbuuninta iyo beegsiga muhaajiriinta” aysan ahayn xalka.
Xoghayaha Amniga Gudaha ee hore Kristi Noem ayaa soo jeedisay in howshu ay diiradda saari doonto khiyaamada fiisaha ee Minnesota, taasoo sii murjisay doodda.
Doodan ayaa taagan iyadoo ay jiraan walaacyo ah in hawlgalku sababi karo qalad iyo cabsi bulsho dhexdeeda ah, gaar ahaan marka la eego tirada iyo xidhiidhada qoysaska Soomaalida ee Twin Cities. Mas’uuliyiinta maxalliga ah waxay ku baaqeen in arrimahan loo wajaho si hufan oo sharciga iyo xuquuqda muwaadiniinta la ixtiraamo, isla markaana aan la marin habaabin oo beegsi lagu sameyn.
